Jóhanna Elísa er 26 ára söngkona, píanóleikari og lagahöfundur. Jóhanna byrjaði að læra á píanó sjö ára eftir að hafa lokið forskóla. Söngurinn bættist við þegar hún var níu ára og hún lauk burtfararprófi úr söng árið 2017 frá Tónlistarskóla FÍH. Hún hefur að auki lokið miðstigi á klassísku píanói, grunnstigi á rytmísktu píanói og grunnstigi í klassískum söng. Síðastliðið vor útskrifaðist Jóhanna úr B.Mus.Ed námi við Listaháskóla Íslands þar sem hún lagði áherslu á laga- og textasmíði ásamt því að vera á tónlistarkennarabraut.
Síðustu ár hefur Jóhanna gefið út tónlist sem má lýsa sem hugljúfri og ævintýralegri blöndu af poppi og klassík. Haustið 2020 gaf hún út breiðskífuna ‘Mystic Moon’ með lögum og útsetningum eftir sig sjálfa. Ásamt því að koma fram með sína eigin tónlist kemur Jóhanna fram við ýmis tilefni eins og t.d. í brúðkaupum, skírnum og veislum.
Jóhanna hefur mikla reynslu af því að vinna með börnum en hún hefur starfað í fjölbreyttu barnastarfi í gegnum árin. Fyrir utan tónlist, finnst Jóhönnu gaman að vera úti í náttúrunni, ferðast og fara í útilegur en samhliða tónlistarkennslu stundar hún nám í Leiðsöguskólanum.
